Berria.eus

Mercedesen aroa luzatuz doa, atzo Lewis Hamiltonek berriro ere pole-a lortu baitzuen. Bigarrena du gidari ingelesak astebeteko tartean, duela astebete Silverstonen lortutakoari atzo Nurburgringekoa gehitu baitzitzaion. Bere taldekidearekin, ordea, ez zuten kudeaketa egokia egin eta Q2 saioan kanporatu zuten, izugarrizko lehia estuan. Txapelketan oraindik Vettel eta Alonso dira buru, baina Mercedeseko gidariak gorakada nabarmenean dira, geldiezinak.

Vettelek lehen lerroan postua lortu zuen bigarren amaituz. Hamiltonek azken hatsean gainditu zuen, Mercedeseko nagusiei albiste ezin hobea emanez. Lasterketan ere erritmo ona agertu dute zilarrezko geziek, eta horrek kontuan hartzeko gidari bilakatzen ditu. Rosbergek oso atzetik hasi beharko badu ere, pneumatikoak aukeratzeko abantaila izango du. Alonsok goma gogorrarekin egin zuen bere sailkapen itzulia Q3 saioan, bera baino azkarragoak izan zirenekiko estrategia desberdina erabiliz.

Bigarren lerroa Webberrek eta Raikkonenek bereganatu zuten. Webber garrantzia galduz joango da urteak aurrera egin ahala, eta Raikkonenek aldiz gora egin behar du azken lasterketetan behera egin ostean. Beroa lagungarri izan zuten Lotus autoek, Raikkonenen esanetan. Benetako beroa lehen lerroan egongo da, baina. Hamiltonek irabazteko grina dauka, Rosbergi erantzuteko. Eta Vettelek Silverstonen galdutakoa berreskuratu nahi du. Ferrari sailkapenak erakusten duena baino hobeto dago, eta podiuma izango du berriro ere helburu Alonsok.

Pos Driver                Team                 Time       Gap       
 1.  Lewis Hamilton       Mercedes             1m29.398s
 2.  Sebastian Vettel     Red Bull-Renault     1m29.501s  +0.103s
 3.  Mark Webber          Red Bull-Renault     1m29.608s  +0.210s
 4.  Kimi Raikkonen       Lotus-Renault        1m29.892s  +0.494s
 5.  Romain Grosjean      Lotus-Renault        1m29.959s  +0.561s
 6.  Daniel Ricciardo     Toro Rosso-Ferrari   1m30.528s  +1.130s
 7.  Felipe Massa         Ferrari              1m31.126s  +1.728s
 8.  Fernando Alonso      Ferrari              1m31.209s  +1.811s
 9.  Jenson Button        McLaren-Mercedes     No time set
10.  Nico Hulkenberg      Sauber-Ferrari       No time set
Q2 cut-off time: 1m30.269s                             Gap ** 
11.  Nico Rosberg         Mercedes              1m30.326s  +0.501s
12.  Paul di Resta        Force India-Mercedes  1m30.697s  +0.872s
13.  Sergio Perez         McLaren-Mercedes      1m30.933s  +1.108s
14.  Esteban Gutierrez    Sauber-Ferrari        1m31.010s  +1.185s
15.  Adrian Sutil         Force India-Mercedes  1m31.010s  +1.185s
16.  Jean-Eric Vergne     Toro Rosso-Ferrari    1m31.104s  +1.279s
Q1 cut-off time: 1m31.681s                              Gap * 
17.  Valtteri Bottas      Williams-Renault      1m31.693s  +1.146s
18.  Pastor Maldonado     Williams-Renault      1m31.707s  +1.160s
19.  Charles Pic          Caterham-Renault      1m32.937s  +2.390s
20.  Jules Bianchi        Marussia-Cosworth     1m33.063s  +2.516s
21.  Giedo van der Garde  Caterham-Renault      1m33.734s  +3.187s
22.  Max Chilton          Marussia-Cosworth     1m34.098s  +3.551s

107% time: 1m36.885s
* Gap to quickest in Q1
** Gap to quickest in Q2