BERRIA

Ibilkari

Ibilkari

eskalada

Egino: "Txomin" bidea, 250 metro, 6a+

Erdi ekipatutako eskalada bide klasikoa izatera deitua dagoena ezagutu nahi?
"Txomin" bidearen nondik norakoak. Zuriz, jaitsierako bidea /

Eginoko Larrenegiko haitzetan dagoen "Txomin" bidea erakargarria izateko osagai guztiak ditu: erdi-ekipatutako bidea, aseguruen arteko tartea luzea, eta eskalatutako askoren iritziz, lehenengo luze gogorra, nahiz eta bidearen zailtasunaren azpitik egon. Bilguneei dagokionez, denak uztaidun bi paraboltez osatuta eta leku erosoetan kokatuta daude.

BIDEAREN DATU BATZUK

Luzera: 250 metro.
Luze kopurua: 6.
Nork irekia: Juan eta Patxi Lasarte anaiak 2001 urtean.
Zailtasuna: 5c. Luzez-luze: 1ºL: 5c (50 m), 2ºL: 4c (40 m), 3ºL: 4c (35 m), 4ªL: 5b (40 m), 5ºL: 6a+ (45 m) eta 6ºL: III+ (40 m).
Orientazioa: Hegoaldea, udan bero handia pasa daiteke. Honegatik ura eramatea gomendatzen dut.
Ura: Eginon dagoen iturri batean hartu daiteke.
Hurbilketa: kotxea uzten den lekutik 20-25 minutu.
Jaitsiera: Eginoko bide hauetatik jarraitzen dena, hau da, Aztorea eta Usoatik jaisten den bidea jarraituz. Bidearen amaieratik kotxera 35-40 minutu inguru pasako dugu.
Eramandako materiala: 60 metroetako bi soka, luzera ezberdinetako 12 express zinta (ez dut uste 10 baino gehiago erabili genituenik), zinta motz eta luzeak harkaitz zubi, orratz eta bilguneetarako, alien semaforoa (grisa ere bai), lincam hori eta gorria eta fisurero joko bat. Walkie-talkie pare bat ere eramatea gomendagarria izan daiteke bilguneen artean oihuka ez aritzeko.
Bidea eskalatzeko pasatako denbora: hiru ordu eta berrogeita hamar minutu.

DESKRIBAPENA

Lehen luzea, 50 metro, 5c. Lehenengo parabolta oso urruti dago, plaka bertikal batean. Berara iristeko plaka inklinatu bat eskalatzen da, leuna lehen metroetan, helduleku eta harlauzaz josita azkenekoetan.

Lehenengo paraboltetik gora luzeari zailtasuna ematen dion pasagunea dago: plaka bertikalaren gaineko sabai itsurako harlauz alderantzikatu bat. Pasagunea eskalatuta, gainean dagoen zuhaixkaren eskuineko erlaitz erosora iritsiko gara.

Hemendik bilgunera arteko eskalada bertikala eta V mailako zailtasun jarraitua du. Luzeak zuzen jarraitzen du sabai antzeko batera iritsi arte. Sabaitxo honetan eskuinera diagonalean metro pare bat egin eta erlaitz eroso batera iritsiko gara.

Erlaitzetik gora diedro itsurako horma bertikala eskalatzen da, iltze batez babestutako sabaitxo batera iritsiz. Nahiz eta zerbait atzeraka egin, sabaitxoan helduleku onak daude.

Sabaitxoa eskalatu ondoren, luzeak diagonalean ezkerrera doa, helduleku on eta bi paraboltez babestutako zeharkaldi diagonala eginez. Zeharkaldia amaitu, metro batzuk zuzen eskalatu eta gainean dauden arteen artetik sartzen da, harri txikiz jositako erlaitz inklinatu zabal batera iritsiz. Erlaitzaren bukaerako plakan bilgunea dago.

Bigarren luzea, 40 metro, 4c. Bilgunearen ezkerretik atera eta, oso egonkorrak ez diren harkaitz bloke batzuk eskalatuz, ezproiaren ertzera igotzen da. Ezproiaren ertzetik metro batzuk eskalatu ondoren lehenengo parabolta dagoen enborrera batera iritsiko gara. Enborraren gainetik metro batzuk egin eta ezproiaren kontra eskuinean dagoen orratz itsurako harkaitz bloke handi bat eskalatzen da. Orratza eskalatuta, honen ezkerrean dagoen zuhaixkara zuzendu eta luzearen bigarren parabolta topatuko dugu. Hemendik ezproiaren bestaldera horizontalean pasatzen da erdian arrail estua duen 5-6 metro inguruko diedro batera iritsiz. Diedroak helduleku ederrak eta auto-babeserako aukera handiak ditu.

Diedroa eskalatu ondoren ezproiaren ertzera itzuli eta, helduleku ederretako plaka eskalatuz, bilgunera iritsiko gara.

Hirugarren luzea, 35 metro, 4c. Bilgunetik zuzen atera eta, helduleku onak dituen plakatik 3-4 metro inguru eskalatu ondoren, lehenengo paraboltera iristen da. Metro batzuk gorago, luzearen bigarren paraboltean aseguratu eta sabaitxo txiki baten azpira iritsitakoan, eskuinera hartu eta eskuin-ezker doan kanal/tximinia belartsua eskalatuko dugu. Tximinia hau bilgunetik dirudiena baino bertikalagoa den arren, auto-babeserako aukera handiak ditu. Tximiniatik atera, plaka tente batean metro batzuk eskalatu eta ezproiaren gainera iristeko dagoen sabaira iritsiko gara. Sabaiaren eskuin aldera jo eta, eskuinetik metro batzuk eskalatu ondoren, berriro ezkerrera itzuliko gara, ezproiaren gainera igo eta bilgunera iritsiz.

Laugarren luzea, 40 metro, 5b. Laugarren luzea parean dugun monolitoa zuzen eta erditik eskalatzen du. Monolitoaren ezkerrean katez osatutako bilgunea eta paraboltez babestutako beste bide bat dago, kontuz honekin, hau ez delako jarraitu behar. Hirugarren "bis" bilgunera iristeko ezproiaren amaiera arte iritsi eta monolitoaren oinera arte destrepatuko dugu, 25-30 metroetako zeharkaldia eginez.
Luzea helduleku oneko arrail bertikal bat eskalatuz hasten da. Arraila, nahiz eta zertxobait atzeraka egin, bi paraboltez babestua dago eta bertatik ateratzeko pausu arraro bat egiten da. Bigarren paraboltetik aseguratu ondoren, arrailetik atera eta gainean dugun artera iritsiko gara, helduleku eta harlauzetan eskuzabala den plaka bertikala eskalatuz. Artearen enbor artetik pasa ondoren, honen eskuinetik gora zuzen doan arraila eskalatuko dugu. Artetik gorako lehenengo metroetan beste pasagune arraro bat dago. Laugarren bilgunea monolitoaren gainean topatuko dugu.

Bosgarren luzea, 45 metro, 6a+. Bosgarren luzeak zeharkatzen duen monolitoa identifikatzea ez da zaila, bere eskuinean haritz handi bat dagoelako. Honetaz aparte, 6a+ pasaguneko plaka bertikalaren alboetako arrailak ere nabariak dira. Hau gutxi ez bada, "Elmer" bidea eskalatuta izanez gero, ez dugu arazorik izango bosgarren luzea identifikatzeko, bide honen ezkerretik doalako. Luzearen oinera iristeko 100 metro eskaseko ibilaldia egiten da.

"Elmer" bidearen plakatxoa eskuinean utzi eta aurretik dugun plaka etzana eskalatzen hasiko gara. Lehen parabolta urrun dago, 12-15 metro ingurura. Plaka etzana bertikal bihurtzen den lekuan fisurero bat sendo jartzeko aukera ematen duen arrakala bat dago.

Plaka bertikala izan arren eskuentzat dauden heldulekuak ederrak dira lehenengo paraboltera zailtasun handirik gabe iritsiko gara. 6a+ pasagunea lehen parabolta eta honen gaineko erlaitz erosoaren artean dago. Pasagunea motza da, heldulekurik gabekoa. Laguntza bakarra plakaren eskuineko arrail zabalaren ertza izango dugu. Hala ere pasagune hau A0 moduan eskalatu daiteke V zailtasunaren mailako pausu behartua eginez.

6a+ pasagunea atzean utzi ondoren erlaitzetik ezkerrera diagonalean doan helduleku oneko kanal itsurakoa 3-4 metro inguruan eskalatuko dugu erlaitz eroso batera iritsi arte. Hemen tximinia utzi eta eskuin aldera beste 3-4 metroetako zeharkaldi diagonala egingo dugu sabai txiki baten azpira iritsiz. Sabaira iritsi aurretik zinta bat pasatzeko aukera duen harkaitz-zubi elegantea dago.

Sabaia eskuinetik errazago gainditzen da, harlauz nabariak plakarekin osatzen duen diedro itsurakoa eskalatuz. Primerako diedroa da, helduleku paregabe eta aseguruak jartzeko aukera onak dituena. Zailtasunari dagokionez V inguruan izango dela esango nuke.
Harlauzaren bi herenak eskalatuta, ezkerrean dugun plakaren erdian luzean dagoen bigarren parabolta topatuko dugu. Bertan aseguratu eta diedroa utziko dugu plakara pasatuz. Plakaren amaieran bilgunea dago.

Seigarren luzea, 40 metro, III+. "Buen. Bilgunetik zuzen plaka inklinatu bat eskalatuko dugu gainean dugun pinakulura arte. Honen ondoren bigarren pinakulu bat III+ zailtasuneko pasagune bertikala eginez eskalatu eta, zailtasun guztiak amaituta, plakaren erdian bilgunera iritsiko gara.

Bide honen inguruko azalpen, argazki eta krokis gehiagorako hemen klik egin dezakezue.

Eguraldia

Euskalmet Lameteoqueviene Aemet Meteo France Accu Weather

Publizitatea

Bidaia eta mendi kronika 2017

bidaia eta mendi kroniken lehiaketa