Edukira joan

Publizitatea

Kolaboratzaileak

385

Aldapak gainditze bidean, ilusioz aurrerantz

Mertxe Mugika | 2013-07-08 | 13:58:05

2012-13 ikasturteak bere onenak eman ditu. Duela gutxi, neguko ikastaroei agur esan genien eta, berehalakoan, udako ikastaro trinkoetan zein barnetegietan arituko diren ikasleei ongi etorria.


Atzera begira jarrita, ikasturte hasiera gogorra izan genuen; matrikulazio datuek ordurako antzemanda genuen beherantzako joera baieztatu besterik ez zuten egin, eta horrek ikasturte hasierako ilusioa nolabait ilundu egin zuen. Baina, gauzak horrela izanda ere, gure altxorrik preziatuena ikaslea da eta hil kanpaiak jotzeak alde batera utzi eta beti bezala, lanean gogoz eta ilusioz aritu ginen eta aritu gara. Izan ere, argi daukagu ikasleak bere ikas-prozesuan aurrera egiten duela ikusten duen momentuan, ikaslea bera izango dela gure lanaren traktorea eta bermea.


Halaber, bi urtean behin Korrika antolatzen dugu, eta ikasturte hau Korrika urtea izan da. Balorazioa egin genuenean "Korrika mundiala" definitu genuen. 18. edizio honek listoia oso altu jarri du, eta euskal herritarrok euskararekiko dugun atxikimendua berriro ere argi geratu da.


Ezin aipatu gabe utzi euskara erabiltzeko asmoz praktika jardueretan apuntatu diren pertsonen kopurua, nabarmen egin baitu gora; bestalde, normalizazio egitasmoak garatzen segitzen duten enpresen multzoa mantendu egin da. Honek guztiak euskararekiko atxikimendua ez ezik, euskalduntzean pausu eraginkorrak emateko herritarren borondate irmoa erakusten digu.


Administrazioei dagokionez, bada, Nafarroan ikasturte osoa pasatu dugu gure lanaren berri ematen, gizartean gure lana gero eta ezagunagoa eta errotuagoa dago, baina administrazioak horren aurrean entzungor egiten du eta gaur egun, oraindik ere, aurten kobratu behar ditugun sosa apurrak kobratzeke daude. Ea uda amaitu baino lehen diru hori bideratuta dugun!!


Iparraldean, berriz, Euskararen Erakunde Publikoarekin harremanetan ari gara. Gure jarduera diruz laguntzeaz gain, Helduen irakaskuntzarako diagonostikoa partekatua lantzen ari gara (eta hori bideratzeko AEK-k diru laguntza lortu du). Bestalde, helduen motibazioa eta ikas-prozesuaz ikerketa unibertsitarioa bultzatzea ere adostu dugu.


EAEn, gobernu aldaketa eman da ikasturte honetan eta zenbait aldaketa ikusten hasiak gara. Aldaketa hauek onerako izan dira eta bere momentuan esan genuen bezala, ikasleen diru laguntzak maila batean berreskuratzea lagungarria izango da, oso, ikasturte berriari begira. Aipatu behar da euskaltegiok jasotzen ditugun diru laguntzak bere horretan mantendu direla.


Bestalde, duela gutxi Euskararen Aholku batzordeak legealdi honetako lehen bilera burutu zuen, eta Lehendakaria bera izan zuen mahaiburu. Bilera horretan Hizkuntz Politikako Sailburuordetzak legealdi honetarako markatu dituen lan ildoan aurkeztu zituen eta lan ildo horietan, besteak beste, eta hitzez hitz, hau dago idatzita: "Helduen euskalduntzea eta euskaltegien lana sendotuko ditugu: helduen euskalduntzeko ikas-sistemak azkartzeko metodologia eta bitartekoak aurreratu, helduen euskalduntze sistemarako sarbidea errazteko bitartekoak eta laguntzak indartu, helduen euskalduntze sistemaren finantzaketa egonkortzeko pausuak eman, Hizkuntzen ikaskuntzarako Europako Markoa euskararen errealitatera egokitu eta euskara ikasteko programa bereziak (malguak eta norberaren neurrikoak) sustatu."


Ildo honetan agertzen dira euskaltegion egoera bideratzeko gakoak. Horiek, eta bestelako arloetarako markatuta dauden lan ildoak, euskararen normalizaziorako garrantzi handikoak dira eta zuzenean ez bada, zeharka euskaltegien jarduerarako lagungarriak izango dira oso.


Baina, euskaltegietan, eskatzeko ez ezik emateko ere bagaude. Dagoeneko 13-14 ikasturteko matrikulazio kanpaina prestatuta dugu. Euskaltegietara hurbildu direnak ahalik eta hoberen artatzeko irakasle prestuak eta prestatuak behar dira eta horregatik, asko dira udan zehar hainbat formazio saiotan parte hartzen ari diren irakasleak. Horretaz gain, euskaltegietako eskaintza moldatzen, ikasleen beharretara egokitzen eta eguneratzen ari gara; izan ere, irakaskuntzako materialetan eta bitartekoetan etengabeko berrikuntzak eman behar izaten dira.


Dudarik gabe emaitzarik ahalik eta egokienak eta ahalik denbora gutxienean lortzea dugu helburu euskaltegiok; hau da, eraginkorrak izatea Horrexegatik guztiagatik, itxaropenez begiratzen diot irailari. Guztion artean ikasle ugari erakarriko ditugulakoan nago, eta euskararen etorkizuneko erronketarako zimentarriak jartzeko gai izango garela ziur naiz.


Besterik gabe, ondo igaro uda eta, ahal den neurrian, udan ere eman euskara elkarri!!!