Edukira joan

Publizitatea

Kolaboratzaileak

163

Euskara haurreskoletan

Joanmari Larrarte | 2013-02-12 | 12:53:59

Haurreskoletan gaztelania erabiltzeko eskaera egin dute EAJk PPk eta UPDk. Ulertezina, euskara indartzea badugu helburu.


Urteak daramatzagu esanez ereduen sistema gainditu eta murgiltzea ziurtatuko duen eredua behar dugula baldin eta nahi badugu haurrek gutxienez bi hizkuntza ofizialak behar bezala jakitea, eskola urteak gainditutakoan. Jakina da A ereduak ez duela euskalduntzen –alegia, ezarritako helburuak ez dituela betetzen, B ereduan ere ez dela euskalduntzen eta D ereduan asko direla behar besteko euskara mailarik gabe amaitzen dutenak derrigorrezko hezkuntza aldia. Kontrakorik ez da inoiz esan, ez da esan gaztelera ez dakien gazterik dagoenik.


Orduan, zer dela eta erdara erabiltzearen alde? Jakina da haur askok euskaraz egiteko duten gune bakarrenetakoa eskola dela, eta hortik kanpo inguru erdalduna dutela. Erdaraz bizi da gure herria (ingururik euskaldunenetan ere bai), erdaraz jasotzen ditugu hedabide gehienak, erdara bazter guztietan entzun eta praktika dezakegu; beraz, ez dago arazorik, gaztelera nahi edo ez ikasiko dute eta ez dute ahaztuko Araban, Bizkaian eta Gipuzkoan.


Eta hala ere, euskarari lekua jan nahi diote haurrak hizkuntzak errazen hartzen dituen garai horretan. Nonbait, beldur gara benetan euskaldunak aterako diren eskolatik eta hori oztopatu nahi da. Ulertezina da hori, euskalduntzea badugu helburu eta bi hizkuntzak jakitea nahi bada. Orain arteko emaitza guztien kontra egiten ari garenez, herri erdaldunagoa izango dugu helburu. Hau lotsagarria da eta onartezina. Wert gutxi behar dugu, gu geu antzeko proposamenak onartzeko gai bagara.


Legebiltzarrak onartu duen eskaeraren testuinguruan, irakurri dut haurrak bere ama hizkuntza erabiltzea garrantzitsua dela, eta hori dela eskaeraren arrazoietako bat. Hori esan duena edo hipokrita hutsa da edo ez daki nola zuritu eragiten ari den atzera pausua. Ama hizkuntza balitz arazoa, gaur egungo Euskal Herrian, ez litzateke gaztelera gehiago eskatuko, horrekin batera beste hainbat hizkuntza eskatuko lirateke, haur asko baitira bestelako ama hizkuntza dutenak. Edo zer, ama hizkuntza gaztelera ez dutenen kasuan ez da garrantzitsua etxeko hizkuntza jasotzea? Argi dago ezetz, izan ere proposamenak gaztelera ziurtatu eta indartzea baitu helburu, eta euskararen berreskurapena moteltzea, lehen abiada motela izan arren.


Duela aste batzuk Wert legea gelditu beharraz ari ginen. Hau ere geratu beharko dugu, bestela gureak egin du!