Edukira joan

Publizitatea

Hemeroteka

D eredua: UPNren gai betierekoa

Nafarroako Kontseiluak, UPNren eskariz, euskarazko matrikulazioari buruzko iritzia plazaratu du
D ereduaren aldeko besta bat, Tafallan.
D ereduaren aldeko besta bat, Tafallan. JAGOBA MANTEROLA / ARGAZKI PRESS

2017-02-14 / Arantxa Iraola

źEz du 2017-2018 ikasturterako matrikulazio prozesuan inolako eraginik izango┬╗. Jose Luis Mendoza Nafarroako Hezkuntza kontseilariak kazetariak deitu behar izan zituen atzo, ezustean, espero ez zuten albiste bati erantzuteko; izan ere, goizean jakin zen Nafarroako Kontseiluak —UPNk galdera eginda— irizpen bat plazaratu duela haurrak D ereduan erkidego osoan matrikulatzeko bidea ematen duen ebazpenari buruz. Hain justu, ebazpen horrek ┬źhierarkia normatiboa┬╗ hautsi egiten duela ondorioztatu du. Kontseiluak erabaki ahalmenik ez duela oroitarazi zuen, ordea, Mendozak, aholku gisara besterik ez direla hartu behar haren adierazpenak, eta, beraz, martxan jarritako eran jarraituko duela matrikulazio prozesuak: eragozpenik gabe. Izan ere, salatu zuen ebazpen horren atzean UPNk euskarazko ereduaren kontra duen jarrera ┬źsuntsitzailea┬╗ besterik ez dagoela. Behin eta berriz agertzen dena, gainera.

Hain zuzen ere, lehendik ere usu zabaldu ditu UPNk D ereduaren inguruko mesfidantzak eta euskarazko irakaskuntza lohitzeko goiburu ugari helarazten ditu hedabideetara; Mendozak berak atzo gogorarazi zuen iaz —eremu ez-euskaldunean lehen aldiz eman zen haurrak euskaraz matrikulatzeko aukera, laukoak halaxe bultzatuta— Erriberan euskarazko eredua ┬źinposatu┬╗ zela salatu zutela alderdi erregionalistako buruek. Badira adibide berriagoak ere: lehengo astean, esaterako, UPN eta PSN elkartu ziren itaun baten inguruan: galdetu zioten gobernuari zergatik egiten duen D ereduaren aldeko kanpaina bakarrik, eta zergatik uzten dituen besteak at. Baliatu zuten aukera foru gobernuak euskararekin ┬źobsesioa┬╗ duela esateko. ┬źInbutuarekin sartu nahi dute euskara┬╗, arbuiatu zuen UPNko ordezkari Javier Esparzak. ┬źToki guztietan sartu nahi dute┬╗. Halaber, usu nabarmendu dute berriz Nafarroako Gobernura heltzen badira, huraxe izango dela lehentasunetako bat: eremu ez-euskaldunean D ereduan matrikulatzeko aukera kendu egingo dute.

Kontu ┬źtekniko┬╗ bat

Mendozaren arabera, kontu ┬źtekniko┬╗ bat ahotan hartuta lohitu nahi izan du oraingoan UPNk D eredua, eta horrekin ┬źsegurtasun falta┬╗ sentiarazi nahi izan die haurrak matrikulatu behar dituzten familiei. Matrikulazio kanpaina, hain zuzen ere, asteon da, eta halako albisteekin giroa uhertu nahi du UPNk: euskararen kalterako. Nolanahi ere, eremu ez-euskaldunean haurrak matrikulatzeko gurasoei emango zaien bidea —bi matrikula eskari egiteko modua ematen zaie, talde batek kale egiten badu umeek beste batean tokia izateko— egokia dela berretsi zuen. Urtarrilean eman zuen gobernuak aukera horren berri, eta, hain justu, defendatu zuten esanez gainerakoan ┬źitsu-itsuan┬╗ egin behar zutela matrikula familia askok.

Iaz eremu ez-euskaldunean berria izan zen euskarazko hautua, kanpaina eraginkorrik ez zen egin, eta lau eskola publikotan soilik lortu zuten gutxieneko ikasle kopurua euskarazko taldeek. Aurten asmo handiagoak ditu gobernuak: aukera eskainiko dute hamalau ikastetxek.

Publizitatea